പുതിയതെരു ഓണപ്പറമ്പിൽ നിന്നും കാണാതായ ടാക്സി ഡ്രൈവറുടെ മൃതദേഹം മാട്ടൂൽ കടപ്പുറത്ത് കണ്ടെത്തി.കുമാരൻ – പ്രേമ ദമ്പതികളുടെ മകനായ ചിറക്കൽ ഓണപ്പറമ്പിലെ കുമ്മക്കാരോത്ത് വീട്ടിൽ പ്രദീപൻ്റെ (54) മൃതദേഹമാണ് കടപ്പുറത്ത് ഇന്ന് പുലർച്ചെ 5.45 ഓടെ മത്സ്യതൊഴിലാളികൾ കണ്ടത്.തുടർന്ന് പഴയങ്ങാടി പോലീസിൽ വിവരമറിയിക്കുകയായിരുന്നു.
ഇക്കഴിഞ്ഞ എട്ടാം തീയതി മുതൽ ഇയാളെ കാണാനില്ലെന്ന് കാണിച്ച് ബന്ധുക്കൾ വളപട്ടണം പോലീസിൽ പരാതി നൽകിയിരുന്നു. കേസെടുത്ത പോലീസ് അന്വേഷണത്തിനിടെയാണ് ഇന്ന് പുലർച്ചെ മാട്ടൂൽ കടപ്പുറത്ത് മൃതദേഹം കണ്ടെത്തിയത്.
ഭാര്യ: പരേതയായ രജിത. മക്കളില്ല.
പഴയങ്ങാടി പോലീസ് വിവരം കൈമാറിയതിനെ തുടർന്ന് ബന്ധുക്കൾ മാട്ടൂൽ കടപ്പുറത്തെത്തി ആളെ തിരിച്ചറിഞ്ഞിട്ടുണ്ട്. പഴയങ്ങാടി പോലീസ് മൃതദേഹം ഇൻക്വസ്റ്റ് നടത്തി.
