കണ്ണൂർ : കാറുകൾ കൂട്ടിയിടിച്ച് ഇരുവാഹനത്തിലുമുണ്ടായിരുന്ന രണ്ടുപേർക്ക് പരിക്കേറ്റു. മുണ്ടയാട് കറുവൻവൈദ്യർ പീടികയ്ക്ക് സമീപം ഞായറാഴ്ച അർധരാത്രിയോടെയാണ് അപകടം.
നിസ്സാരപരിക്കേറ്റ ഇരുവരും കണ്ണൂരിലെ ആസ്പത്രിയിൽ ചികിത്സ തേടി. കണ്ണൂർ ഭാഗത്തേക്ക് പോകുന്ന കാറും എതിർദിശയിൽ വരികയായിരുന്ന മറ്റൊരു കാറുമാണ് കൂട്ടിയിടിച്ചത്. ഇരുകാറിന്റെയും മുൻവശം തകർന്നു.
അപകടത്തെത്തുടർന്ന് റോഡിൽ പരന്ന എണ്ണ അഗ്നിരക്ഷാസേനയെത്തി മണൽ വിതറി വാഹനങ്ങൾ തെന്നുന്നത് ഒഴിവാക്കി. പോലീസും സ്ഥലത്തെത്തി.
