കണ്ണൂരിൽ കാറിൽ ചാരിനിന്നതിന് കാർ ഉടമയുടെ ആക്രമണത്തിന് ഇരയായ ഗണേഷ് എന്ന ബാലന്റെ വാർത്ത നെഞ്ചിൽ ഒരു പിടച്ചിലോടുകൂടിയെ പലർക്കും കേൾക്കാൻ സാധിച്ചുള്ളൂ. രാജസ്ഥാനിൽ നിന്നുള്ള വഴിവാണിഭക്കാരായ കുടുംബത്തിലെ അംഗമാണ് ഈ ആറ് വയസ്സുകാരൻ. കുട്ടിയെ മർദിക്കുന്ന സി.സി.ടി.വി. രംഗങ്ങൾ പുറത്തു വന്നിരുന്നു. കുട്ടിയെ ആക്രമിച്ച ഷിഷാദ് എന്നയാളെ പോലീസ് കസ്റ്റഡിയിൽ എടുക്കുകയും ചെയ്തു.
ഗണേഷിനെ തേടി ഒരു സമ്മാനപ്പൊതി ആലപ്പുഴ കളക്ട്രേറ്റിൽ കൊറിയർ വഴി വരികയുണ്ടായി. ഉള്ളിൽ നോട്ട്ബുക്കുകൾ, ചോക്ലേറ്റ്, കളിപ്പാട്ടങ്ങൾ, പേന, ക്രയോൺസ് എന്നിവയുണ്ടായിരുന്നു. തുറന്നു നോക്കിയ കളക്ടർ കൃഷ്ണ തേജ ആ പൊതി തന്റെ സുഹൃത്തുക്കൾ വഴി ഗണേഷിനെത്തിച്ചു. വൈക്കം നേരേകടവ് ഗവൺമെന്റ് എൽ.പി. സ്കൂളിലെ മുന്നാം ക്ലാസ് വിദ്യാർത്ഥി നിഥിൻ മനോജാണ് ഇങ്ങനെയൊരു സമ്മാനത്തിന് പിന്നിൽ. സമ്മാനപ്പൊതി ഇവിടെ എത്താനുണ്ടായ കാരണം സഹിതം കളക്ടർ ഫേസ്ബുക്ക് പോസ്റ്റിൽ പരാമർശിച്ചു.
