സംസ്ഥാനത്തെ ഏറ്റവും മികച്ച ബ്രാഞ്ചിനുള്ള അവാർഡ് ഇന്ത്യൻ അക്കാദമി ഓഫ് പീഡിയാട്രിക്സ് (ഐ.എ.പി) കണ്ണൂർ ബ്രാഞ്ചിന് ലഭിച്ചു. കോഴിക്കോട് വെച്ച് നടന്ന അൻപത്തിയൊന്നാമത് സംസ്ഥാന സമ്മേളനത്തിലാണ് കേരളത്തിലെ ഏറ്റവും മികച്ച പ്രവർത്തനം കാഴ്ചവെക്കുന്ന ബ്രാഞ്ചിനുള്ള സംസ്ഥാന അവാർഡ് കണ്ണൂർ ബ്രാഞ്ച് കരസ്ഥമാക്കിയത്. ഐ.എ. പി മുൻ ദേശീയ പ്രസിഡന്‍റ് ഡോ.ടി.യു സുകുമാരനിൽ നിന്നും ബ്രാഞ്ച് ഭാരവാഹികളായ ഡോ. മൃദുല ശങ്കർ, ഡോ.എം.കെ. നന്ദകുമാർ, ഡോ. അജിത് സുഭാഷ് എന്നിവർ അവാർഡുകൾ ഏറ്റുവാങ്ങി. ഏറ്റവും മികച്ച ബ്രാഞ്ച് സെക്രട്ടറിക്കുള്ള അവാർഡ് സംസ്ഥാന പ്രസിഡന്‍റ് ഡോ.എം. വിജയകുമാറിൽ നിന്നും ബ്രാഞ്ച് സെക്രട്ടറി ഡോ. മൃദുല ശങ്കർ ഏറ്റുവാങ്ങി. ഓ.ആർ.എസ് ബോധവത്കരണം, ഡൗൺ സിൻഡ്രോം ബാധിച്ച കുട്ടികൾക്കായുള്ള പ്രത്യേക പ്രവർത്തനങ്ങൾ, ആൻറി ബയോട്ടിക്കുകളുടെ ദുരുപയോഗത്തിനെതിരെയുള്ള ബോധവത്കരണം, മുലയൂട്ടൽ വാരാചരണ പ്രവർത്തനങ്ങൾ തുടങ്ങിയ വൈവിധ്യമാർന്ന പ്രവർത്തനങ്ങൾക്കുള്ള അംഗീകാരമായിട്ടാണ് മികച്ച ബ്രാഞ്ചായി കണ്ണൂർ തിരഞ്ഞെടുക്കപ്പെട്ടത്.
