തിരുവനന്തപുരം | മുതിര്‍ന്ന കോണ്‍ഗ്രസ് നേതാവും മുന്‍ മന്ത്രിയും സ്പീക്കറും ഗവര്‍ണറുമായിരുന്ന വക്കം പുരുഷോത്തമന്‍ (95) അന്തരിച്ചു.
അഞ്ച് തവണ നിയമസഭയിലേക്ക് തിരഞ്ഞെടുക്കപ്പെട്ട വക്കം മൂന്ന് തവണ മന്ത്രിയായി. രണ്ട് ടേം ലോക്‌സഭാ അംഗമായിരുന്നു.
രണ്ട് തവണയായി ഏറ്റവും കൂടുതല്‍ കാലം നിയമസഭാ സ്പീക്കര്‍ സ്ഥാപനം വഹിച്ച റെക്കോഡും വക്കം പുരുഷോത്തമന്റെ പേരിലായിരുന്നു. മിസോറാം ഗവര്‍ണറായും ആന്‍ഡമാന്‍ നിക്കോബാര്‍ ദ്വീപ് ലഫ്റ്റനന്റ് ഗവര്‍ണറായും ചുമതല വഹിച്ചിട്ടുണ്ട്.
ആറ്റിങ്ങലിലെ വക്കത്ത് 1928 ഏപ്രില്‍ 12-ന് ജനിച്ച വക്കം, സ്റ്റുഡന്റ്‌സ് കോണ്‍ഗ്രസ് വിദ്യാര്‍ഥി സംഘടനയിലൂടെ ആണ് പൊതു പ്രവര്‍ത്തന രംഗത്തേക്ക് കടന്നത്. തിരുവനന്തപുരം ഡി സി സി സെക്രട്ടറി, കെ പി സി സി ജനറല്‍ സെക്രട്ടറി, വൈസ് പ്രസിഡന്റ് സ്ഥാനങ്ങളും വഹിച്ചിട്ടുണ്ട്.
