കഞ്ചാവ് മാഫിയ വീട് കയറി ആക്രമിച്ചെന്ന് പരാതി. ആക്രമത്തിൽ എസ്എഫ്ഐ സംസ്ഥാന കമ്മിറ്റിയംഗം ഉൾപ്പെടെ നാല് പേർക്ക് പരുക്കേറ്റു.പാലക്കാട് ചാലിശ്ശേരി കുന്നത്തേരി സ്വദേശി ശരത്തിന്റെ വീട്ടിൽ കയറി ആയിരുന്നു ലഹരി മാഫിയയുടെ ആക്രമണം. ശരത്തിനും സുഹൃത്തുക്കളായ നിമേഷ്, ജിഷ്ണു, ലമ്മീസ് എന്നിവർക്കും പരുക്കേറ്റു.
20 അംഗ സംഘം വീടുകയറി ആക്രമിക്കുകയായിരുന്നു. പരുക്കേറ്റ നിമേഷ് എസ്എഫ്ഐ സംസ്ഥാന കമ്മിറ്റിയംഗമാണ്. ശരത്തിന്റെ വീട്ടിൽ ഭക്ഷണം കഴിച്ചുകൊണ്ടിരിക്കവെ വീടിനകത്തേക്ക് അതിക്രമിച്ച് കയറി സംഘം മാരകായുധം കൊണ്ട് ആക്രമിക്കുകയായിരുന്നു. ഇരുമ്പ് വടി, ചുറ്റിക അടക്കമുളള ആയുധങ്ങൾ സംഘത്തിന്റെ കൈവശമുണ്ടായിരുന്നതായി ശരത്ത് പറഞ്ഞു.
കുന്നത്തേരി സ്വേദശികൾ തന്നെയാണ് ആക്രമണത്തിന് പിന്നിലെന്നാണ് വിവരം. എംഡിഎംഎ അടക്കമുളള മാരക മയക്കുമരുന്നുകൾ ഉപയോഗിക്കുന്നതിൽ നിന്ന് ആക്രമികളെ ശരത്തും സുഹൃത്തുക്കളും തടഞ്ഞിരുന്നു. ഇതിൽ വൈരാഗ്യം തോന്നിയതാണ് ആക്രമണത്തിന് കാരണമെന്നാണ് നിഗമനം. ആക്രമം നടത്തിയവർ ഒളിവിൽ പോയിരിക്കുകയാണ്.
