കണ്ണൂർ ദസറയുടെ ഒമ്പത് ദിവസത്തെ പരിപാടികൾ അടങ്ങിയ പോസ്റ്റർ മേയർ അഡ്വ. ടി ഒ മോഹനൻ പ്രസ് ക്ലബ് പ്രസിഡണ്ട് സിജി ഉലഹന്നാന് നൽകി പ്രകാശനം ചെയ്തു.
കണ്ണൂരിന് നിറങ്ങളുടെയും കാഴ്ചകളുടെയും വിരുന്നൊരുക്കികൊണ്ട് നീണ്ട ഇടവേളയ്ക്കു ശേഷം കണ്ണൂര്‍ ദസറ വീണ്ടും നടത്തുന്നതിന് കണ്ണൂര്‍ കോര്‍പറേഷന്‍ തീരുമാനിച്ചു . ഒരു കാലത്ത് കണ്ണൂരിലെ ജനത പ്രൗഢിയോടെ നെഞ്ചിലേറ്റിയിരുന്ന രണ്ടാം ദസറ എന്നറിയപ്പെട്ടിരുന്ന നവരാത്രി ആഘോഷം, പഴയ തലമുറയുടെ മനസ്സില്‍ വര്‍ണ്ണരാജികള്‍ വിടര്‍ത്തി ഇന്നും മായാതെ നില്‍ക്കുന്നുണ്ടാകും.
കണ്ണൂരിലെ വാണിജ്യ മേഖലയെ ഉത്തേജിപ്പിച്ചിരുന്ന വ്യാപാര ഉത്സവം കൂടിയായിരുന്ന കണ്ണൂര്‍ ദസറയുടെ പ്രൗഢി വീണ്ടെടുത്ത് എല്ലാ വിഭാഗം ജനങ്ങള്‍ക്കും ഒത്തൊരുമിക്കാനുള്ള ഒരു വേദി സൃഷ്ടിക്കുകയാണ് കോര്‍പറേഷന്‍ ഇതിലൂടെ ഉദ്ദേശിക്കുന്നത്.
ഡിടിപിസി, കേരള ഫോക്ലോര്‍ അക്കാദമി എന്നിവയുടെ സഹകരണവും പരിപാടികള്‍ക്കുണ്ട്. സെപ്റ്റംബര്‍ 26 മുതല്‍ ഒക്ടോബര്‍ 4 വരെ കണ്ണൂര്‍ കലക്ടറേറ്റ് മൈതാനിയില്‍ പ്രത്യേകം തയ്യാറാക്കിയ വേദിയില്‍ എല്ലാ ദിവസവും വര്‍ണ്ണശബളമായ കലാപരിപാടികളും സാസ്കാരിക സമ്മേളനങ്ങളും നടക്കുന്നതാണ്.
കൊവിഡ് മഹാമാരിമൂലം കഴിഞ്ഞ രണ്ട് വര്‍ഷമായി കണ്ണൂരിലെ സാംസ്കാരിക പരിപാടികളെല്ലാം മുടങ്ങിയ സാഹചര്യത്തില്‍ കണ്ണൂരിലെ സഹൃദയര്‍ മുമ്പാകെ ഇന്ത്യയിലെ തന്നെ മുന്‍നിര കലാ പ്രതിഭകള്‍ തന്നെ ദസറയില്‍ പങ്കെടുത്ത് കലാപരിപാടികള്‍ അവതരിപ്പിക്കുന്നുണ്ട്. കൂടാതെ കണ്ണൂരിലെ വളര്‍ന്നു വരുന്ന കലാപ്രതിഭകള്‍ക്കും എല്ലാ ദിവസവും വിവിധ പരിപാടികള്‍ അവതരിപ്പിക്കുന്നതിനായി അവസരം നല്‍കിയിട്ടുണ്ട്.
കണ്ണൂര്‍ ദസറയുടെ ഇത്തവണത്തെ മുദ്രാവാക്യം ‘കളറാക്കാം ദസറ – കളയാം ലഹരിക്കറ’ എന്നാണ്. ദസറവേദിയില്‍ ലഹരി വിരുദ്ധ സന്ദേശങ്ങളടങ്ങിയ ഷോര്‍ട്ട് ഫിലിം പ്രദര്‍ശനവും മറ്റ് പരിപാടികളും ഉണ്ടായിരിക്കും.
ദസറയുടെ പ്രചരണാര്‍ത്ഥം വരും ദിവസങ്ങളില്‍ നഗരത്തിന്‍റെ വിവിധ ഭാഗങ്ങളില്‍ ഫ്ളാഷ് മോബ് അരങ്ങേറും. 23.9.22ന് കണ്ണൂരിലെ പത്രപ്രവര്‍ത്തകരുടെ പ്രസ്സ്ക്ലബ് ടീമും കൗണ്‍സിലര്‍മാരും ജീവനക്കാരുമടങ്ങിയ കോര്‍പറേഷന്‍ ടീമൂം തമ്മില്‍ വൈകീട്ട് 6 മണിക്ക് സൗഹൃദ ഫുട്ബാള്‍ മത്സരവും നടക്കുന്നതാണ്.
കൂടാതെ ദസറയ്ക്ക് മുന്നോടിയായി ബഹുജന പങ്കാളിത്തത്തോടെ കോര്‍പറേഷന്‍ പരിധിയില്‍ ‘കളറാക്കാം ദസറ, ക്ലീനാക്കാം കണ്ണൂര്‍’ എന്ന സന്ദേശമുയര്‍ത്തികൊണ്ട് ശുചീകരണ പരിപാടിയും നടക്കുന്നതാണ്.
പത്രസമ്മേളനത്തില്‍ മേയര്‍ അഡ്വ.ടി.ഒ.മോഹനന്‍, ഡെപ്യൂട്ടി മേയര്‍ കെ.ഷബീന ടീച്ചര്‍, സ്റ്റാന്‍റിംഗ് കമ്മിറ്റി ചെയര്‍മാന്‍മാരായ സുരേഷ് ബാബു എളയാവൂര്‍, എം.പി.രാജേഷ്, പി .ഷമീമ ടീച്ചര്‍, അഡ്വ.പി.ഇന്ദിര, ഷാഹിന മൊയ്തീന്‍ കൗൺസിലർമാരായ മുസ്ലിഹ് മഠത്തിൽ, ടി.രവീന്ദ്രന്‍, ജനറല്‍ കണ്‍വീര്‍ കെ.സി.രാജന്‍ മാസ്റ്റര്‍, കോര്‍പറേഷന്‍ സെക്രട്ടറി വി.വി.ലതേഷ്കുമാര്‍, എന്നിവര്‍ പത്രസമ്മേളനത്തില്‍ പങ്കെടുത്തു.
