കണ്ണൂര്‍ : കേരള ബ്ലാസ്റ്റേഴ്‌സിന്റെയും ഇന്ത്യയുടെയും മുന്നേറ്റ നിര താരം സഹല്‍ അബ്ദുള്‍ സമദ് വിവാഹിതനാകുന്നു. ബാഡ്മിന്റണ്‍ താരം റേസ ഫര്‍ഹത്തുമായുള്ള വിവാഹ നിശ്ചയം കഴിഞ്ഞു. സമൂഹമാധ്യമങ്ങളില്‍ നിരവധി പേരാണ് ഇരുവര്‍ക്കും ആശംസകളുമായി എത്തിയത്.
എന്റെ ജീവിത പങ്കാളിയെ കണ്ടെത്തിക്കഴിഞ്ഞു എന്നായിരുന്നു വിവാഹ നിശ്ചയ ചിത്രം പങ്കുവെച്ചുകൊണ്ട്‌ സഹല്‍ ഇന്‍സ്റ്റാഗ്രാമില്‍ കുറിച്ചത്. ഐഎസ്എലിന്റെ കഴിഞ്ഞ സീസണില്‍ ബ്ലാസ്റ്റേഴിസിന്റെ സുപ്രധാന താരങ്ങളില്‍ ഒരാളായിരുന്നു സഹല്‍.കഴിഞ്ഞമാസം നടന്ന എഎഫ്‌സി കപ്പ് യോഗ്യത റൗണ്ട് മത്സരത്തില്‍ ഇന്ത്യയ്ക്കായി വിജയ ഗോൾ നേടിയതും സഹലായിരുന്നു.
കണ്ണൂര്‍ പയ്യന്നൂർ സ്വദേശിയായ സഹല്‍ യുഎഇയിലെ അല്‍ഐനിലാണ് ജനിച്ചത്. എട്ടാം വയസ്സില്‍ അബുദാബിയിലെ അല്‍-ഇത്തിഹാദ് സ്പോര്‍ട്സ് അക്കാദമിയില്‍ നിന്ന് ഫുട്ബാള്‍ കളിക്കാന്‍ ആരംഭിച്ച സഹല്‍ കേരളത്തിലെത്തിയ ശേഷം കണ്ണൂര്‍ യൂണിവേഴ്സിറ്റി തലത്തില്‍ മികച്ച പ്രകടനങ്ങള്‍ നടത്തി തുടങ്ങി.
മികച്ച പ്രകടനങ്ങളെ തുടര്‍ന്ന് അണ്ടര്‍21 കേരള ടീമിലെത്തിയ സഹല്‍ സന്തോഷ് ട്രോഫി ടീമിലും ഇടം ലഭിച്ചു. സഹലിന്റെ മികച്ച പ്രകടനത്തോടെ ബ്ലാസ്റ്റഴ്സ് ക്ലബിലെത്തുകയായിരുന്നു.കേരള ബ്ലാസ്റ്റേഴ്സ് സഹലിന് ആശംസയറിയിച്ച് ട്വീറ്റ് ചെയ്തിട്ടുണ്ട്. സഹലിന്റെ പോസ്റ്റിന് താഴെ താരത്തിന്റെ ഇന്ത്യന്‍ ടീമിലെയും ബ്ലാസ്റ്റേഴ്സിലെയും സഹതാരങ്ങളും ആശംസ അറിയിച്ചിട്ടുണ്ട്.
