അവിട്ടം നാളിൽ ജനങ്ങളെ വലച്ച് കോഴിക്കോട് വടകരയിൽ സ്വകാര്യ ബസുകളുടെ മിന്നൽ പണിമുടക്ക്. വടകര-തലശ്ശേരി റൂട്ടിൽ സർവ്വീസ് നടത്തുന്ന ബസ് ജീവനക്കാരെ ഒരു സംഘം മർദ്ദിച്ചതിൽ പ്രതിഷേധിച്ചാണ് സർവ്വീസ് നിർത്തിവെച്ചത്. ജീവനക്കാരെ മർദ്ദിക്കുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്.അക്രമികളെ തിരിച്ചറിഞ്ഞിട്ടും പൊലീസ് അറസ്റ്റ് ചെയ്യുന്നില്ലെന്ന് പറഞ്ഞ് ആണ് മിന്നൽ പണിമുടക്ക്.
വടകരയ്ക്കടുത്ത അഴിയൂരിൽ ബസ് തടഞ്ഞ് വെച്ച് ഒരു സംഘം ബസ് ജീവനക്കാരെ മർദ്ദിക്കുകയായിരുന്നു. വടകര-തലശ്ശേരി റൂട്ടിൽ സർവ്വീസ് നടത്തുന്ന വിടാര ബസിലെ ഡ്രൈവർ നിജിൽ, കണ്ടക്ടർ രസ്നേഷ് എന്നിവരാണ് മർദ്ദനത്തിനിരയായത്. ഇന്നലെ വൈകീട്ട് ആറു മണിയോടെയായിരുന്നു സംഭവം.
ഓട്ടോറിക്ഷയ്ക്ക് സൈഡ് കൊടുക്കുന്നതുമായി ബന്ധപ്പട്ട തർക്കമാണ് സംഘർഷത്തിലേക്ക് കലാശിച്ചത്. വാക്കേറ്റം പിന്നീട് കൈയ്യാങ്കളിയിലേക്കെത്തുകയായിരുന്നു. ബസ് ജീവനക്കാരുടെ പരാതിയിൽ കേസ് എടുത്തതായി ചോമ്പാല പൊലീസ് പറഞ്ഞു. പ്രതികൾക്കായുള്ള അന്വേഷണം നടത്തി വരികയാണെന്നും പൊലീസ് അറിയിച്ചു.
