കണ്ണൂർ: ഏഷ്യാനെറ്റ് ന്യൂസിന്റെ കൊച്ചി റീജണൽ ഓഫീസിൽ എസ്എഫ്ഐ പ്രവർത്തകർ അതിക്രമിച്ച് കയറുകയും ജീവനക്കാരെ ഭീഷണിപ്പെടുത്തുകയും ചെയ്ത സംഭവത്തിൽ പ്രതിഷേധിച്ച് കേരള പത്രപ്രവർത്തക യൂണിയൻ ജില്ലാ കമ്മിറ്റിയുടെ നേതൃത്വത്തിൽ കണ്ണൂർ നഗരത്തിൽ പ്രതിഷേധ പ്രകടനം നടത്തി. കണ്ണൂർ പ്രസ്ക്ലബിൽ നിന്ന് ആരംഭിച്ച പ്രകടനം കളക്ടറേറ്റിന് മുന്നിലൂടെ പഴയ ബസ് സ്റ്റാൻഡിൽ സമാപിച്ചു. തുടർന്ന് നടന്ന പ്രതിഷേധയോഗം കെയുഡബ്ല്യുജെ സംസ്ഥാന കമ്മിറ്റിയംഗം പ്രശാന്ത് പുത്തലത്ത് ഉദ്ഘാടനം ചെയ്തു. പ്രസ്ക്ലബ് പ്രസിഡന്റ് സിജി ഉലഹന്നാൻ അധ്യക്ഷത വഹിച്ചു. സെക്രട്ടറി കെ.വിജേഷ്, മുൻ സംസ്ഥാന ജനറൽ സെക്രട്ടറി സി.നാരായണൻ, ജില്ലാ വൈസ് പ്രസിഡന്റ് സബിന പദ്മൻ, എക്സിക്യുട്ടീവ് കമ്മിറ്റിയംഗം എൻ.വി. മഹേഷ്ബാബു എന്നിവർ പ്രസംഗിച്ചു. എക്സിക്യൂട്ടീവ് കമ്മിറ്റിയംഗങ്ങളായ ടി.പി. വിപിൻദാസ് , ശ്രീജിത്ത് പരിയാരം എന്നിവർ നേതൃത്വം നൽകി.
