പാപ്പിനിശ്ശേരിയിൽ തെരുവുനായ പാഞ്ഞടുത്തതിനെ തുടർന്ന് സ്കൂട്ടറിൽ നിന്ന്‌ വീണ് ഒരാൾക്ക് പരിക്ക്. കോലത്തുവയൽ മാധവൻപീടികക്ക് സമീപത്തെ മുഹമ്മദ് ആദി(19)ക്കാണ് പരിക്കേറ്റത്. കഴിഞ്ഞ ദിവസം പാപ്പിനിശ്ശേരി കോലത്തുവയലിൽനിന്ന്‌ അരോളിയിലെ സുഹൃത്തിന്റെ വീട്ടിൽ പോയി മടങ്ങിവരവെ അരോളി സ്കൂളിന്റെയും കല്ലയ്ക്കൽ പള്ളിക്കും ഇടയിൽ വെച്ചാണ് തെരുവുനായ ഓടിയടുത്തത്.
എൻട്രൻസ് പരീക്ഷയെഴുതി എൻജിനിയറിങ് പ്രവേശനത്തിന് ഒരുങ്ങുകയാണ് മുഹമ്മദ് ആദി. അരോളിയിലെ സുഹൃത്തിനെ കണ്ട് വീട്ടിലേക്ക് മടങ്ങവേ നായ റോഡ് മുറിച്ചുകടന്നുപോകുന്നത് കണ്ട് സ്കൂട്ടർ നിർത്തിയിരുന്നു. ആ സമയം നായ ആദിയുടെ നേരേ പാഞ്ഞടുക്കുകയായിരുന്നു. സ്കൂട്ടറടക്കം റോഡരികിൽ മറിഞ്ഞുവീണു.
നായ ദേഹത്ത് തട്ടിയിട്ടില്ലെന്നും കടിയേറ്റിട്ടില്ലെന്നുമാണ് യുവാവ് പറയുന്നത്. വീഴ്ചയിൽ കൈമുട്ടിനും കാലിനും ചതവ് സംഭവിച്ചു. പാപ്പിനിശ്ശേരി ആശുപത്രിയിൽ ചികിത്സ തേടിയെങ്കിലും വിദഗ്‌ധ ചികിത്സ നിർദേശിച്ചതിനാൽ കണ്ണൂരിലെ സഹകരണ ആശുപത്രിയിൽ പ്രവേശിപ്പിച്ചു.
