തിരുവനന്തപുരം > തലസ്ഥാന നഗരിക്ക്‌ ഓണസമ്മാനമായി കെഎസ്‌ആർടിസി സിറ്റി സർക്കുലറിന്റെ ഭാഗമായി 60 ഇലക്‌ട്രിക്‌ ബസ്‌ കൂടി പുറത്തിറക്കി. ചാല ഗവ. മോഡൽ ബോയ്‌സ്‌ സ്‌കൂൾ ഗ്രൗണ്ടിൽ മുഖ്യമന്ത്രി പിണറായി വിജയൻ ബസുകളുടെ ഫ്ലാഗ്‌ ഓഫ്‌ നിർവഹിച്ചു. മാർഗദർശി ആപ് ഉദ്‌ഘാടനവും മുഖ്യമന്ത്രി നിർവഹിച്ചു. ഇതോടെ നഗരത്തിലെ ഇലക്‌ട്രിക്‌ ബസുകളുടെ എണ്ണം 110 ആയി.
62 ബസുകളാണ്‌ ഒമ്പത്‌ റൂട്ടുകളിൽ സിറ്റി സർക്കുലർ സർവീസ്‌ നടത്തുന്നത്‌. ഇതിലുള്ള 12 ഡീസൽ എൻജിൻ ഇനി നഗരത്തിന്‌ പുറത്തേക്കുള്ള റേഡിയൽ സർവീസിനായി ഉപയോഗിക്കും. നാലു റൂട്ടുകളിലായി ഇൻഡിഗോ (നമ്പർ10), ഗോൾഡ്‌ (11), ഒലിവ്‌ (12), സിയാൻ (13) എന്നിങ്ങനെ സർവീസ്‌ നടത്തും. ഒരു സ്ഥലത്തുനിന്ന്‌ പുറപ്പെട്ട്‌ അതേ വഴിതന്നെ തിരിച്ച്‌ സർവീസ്‌ ആരംഭിച്ച സ്ഥലത്തേക്ക്‌ വരുന്നതാണ്‌ പോയിന്റ്‌ ടു പോയിന്റ്‌ സർവീസ്‌. ഇത്‌ തിരിച്ചറിയാനുള്ള എംബ്ലവും പുറത്തിറക്കി. മാറിക്കയറി യാത്ര ചെയ്യാൻ സാധിക്കുന്ന ഇന്റർ ചെയ്‌ഞ്ച്‌ സ്‌റ്റോപ്പും അവതരിപ്പിക്കും. കെഎസ്‌ആർടിസി ബസ്‌ സ്‌റ്റോപ്പ്‌ തിരിച്ചറിയാൻ സഹായിക്കുന്ന എംബ്ലം പതിച്ച ബോർഡുകളും സ്ഥാപിക്കും.
