കുതിരവട്ടം മാനസികാരോഗ്യ കേന്ദ്രത്തില്‍ നിന്നും ചാടിപ്പോയ കൊലക്കേസ് പ്രതി പിടിയില്‍. പെരിന്തല്‍മണ്ണ ദൃശ്യ കൊലക്കേസിലെ പ്രതി നറുകര ഉതുവേലി കുണ്ടുപറമ്പില്‍ വിനീഷിനെയാണ് കര്‍ണാടകയില്‍ നിന്നും പൊലീസ് പിടികൂടിയത്. ധര്‍മസ്ഥലയില്‍ നിന്ന് വാഹനം മോഷ്ടിക്കാന്‍ ശ്രമിക്കുന്നതിനിടെ നാട്ടുകാര്‍ പിടികൂടിയാണ് ഇയാളെ പൊലീസില്‍ ഏല്‍പ്പിച്ചത്. കോഴിക്കോട് നിന്ന് ട്രെയിനില്‍ മംഗലാപുരത്തെത്തിയ പ്രതി അവിടെ നിന്ന് ധര്‍മസ്ഥലയിലെത്തുകയായിരുന്നു. പ്രതിയെ കൊണ്ടുവരാന്‍ കേരള പൊലീസ് ധര്‍മസ്ഥയിലേക്ക് പോയിട്ടുണ്ട്. ഇന്ന് കോഴിക്കോടെത്തിക്കുമെന്നാണ് വിവരം.
ഞായറാഴ്ച രാത്രിയാണ് വിനീഷ് കുതിരവട്ടം മാനസികാരോഗ്യ കേന്ദ്രത്തില്‍ നിന്നും കടന്നത്. മാനസികാസ്വാസ്ഥ്യം പ്രകടിപ്പിച്ചതിനെ തുടര്‍ന്ന് കണ്ണൂര്‍ സെന്‍ട്രല്‍ ജയിലില്‍ നിന്ന് കുറച്ചു ദിവസങ്ങള്‍ക്ക് മുമ്പാണ് ഇയാളെ കുതിരവട്ടത്ത് എത്തിച്ചത്.വിനീഷിനൊപ്പമുണ്ടായിരുന്ന മറ്റൊരു അന്തേവാസിയുടെ വിരലില്‍ മോതിരം കുരുങ്ങിയതിനെ തുടര്‍ന്ന് അഴിച്ചുമാറ്റാന്‍ അഗ്നി രക്ഷാ സേന എത്തിയിരുന്നു. ഇവര്‍ക്കായി സെല്‍ തുറന്ന സമയം വിനീഷ് രക്ഷപ്പെടുകയായിരുന്നു.
നേരത്തെ റിമാന്‍ഡിലിരിക്കെ ഇയാള്‍ ആത്മഹത്യാശ്രമം നടത്തിയിരുന്നു. കൊതുകുതിരി കഴിച്ചാണ് അന്ന് പ്രതി ആത്മഹത്യയ്ക്ക് ശ്രമിച്ചത്. കഴിഞ്ഞ വര്‍ഷമാണ് വിവാഹാഭ്യര്‍ത്ഥന നിരസിച്ചതിന് ഏലംകുളം എളാട് സ്വദേശി ദൃശ്യയെ പ്രതി കുത്തിക്കൊലപ്പെടുത്തിയത്. സംഭവ ദിവസം തന്നെ ഇയാളെ പൊലീസ് കസ്റ്റഡിയിലെടുത്തിരുന്നു. കൊലപാതക ശേഷം ഓടി രക്ഷപ്പെട്ട പ്രതി വഴിയില്‍ കണ്ട ഓട്ടോറിക്ഷയില്‍ കയറി രക്ഷപ്പെടാന്‍ ശ്രമിച്ചെങ്കിലും ഡ്രൈവര്‍ തന്ത്രപൂര്‍വ്വം സ്റ്റേഷനിലെത്തിച്ച് പൊലീസിന് കൈമാറുകയായിരുന്നു.
