മാഹി: മാധ്യമ പ്രവര്‍ത്തകയോട് അപമര്യാദയായി പെരുമാറുകയും ചോദ്യം ചെയ്ത സുഹൃത്തിനെ മര്‍ദിക്കുകയും ചെയ്ത അഞ്ചുപേരില്‍ നാലുപേരെ അറസ്റ്റുചെയ്തു.തിങ്കളാഴ്ച രാത്രി 9.45 ഓടെ മാഹി പാറക്കല്‍ ഐ.ബി.പി പെട്രോള്‍ പമ്ബിലാണ് സംഭവം. എറണാകുളത്തേക്ക് പോകുന്നതിനിടെ ഇന്ധനം നിറക്കാന്‍ മാഹിയില്‍ സുഹൃത്തിനോടൊപ്പം കാറില്‍ വന്ന മാധ്യമ പ്രവര്‍ത്തകയോടാണ് മറ്റൊരു കാറില്‍ എത്തിയ അഞ്ചംഗ സംഘം അപമര്യാദയായി പെരുമാറിയത്. ഇത് ചോദ്യം ചെയ്ത മാധ്യമ പ്രവര്‍ത്തകയുടെ സുഹൃത്തിനെ സംഘം മര്‍ദിക്കുകയും ഭീഷണിപ്പെടുത്തുകയും ചെയ്തു.കാറിലെത്തിയ അഞ്ചംഗ സംഘത്തിലെ ഒരാള്‍ പൊലീസ് എത്തിയതോടെ ഓടിരക്ഷപ്പെട്ടു. മറ്റ് നാല് പ്രതികളെയും അറസ്റ്റുചെയ്തു. ഓര്‍ക്കാട്ടേരി ഏറാമല സ്വദേശികളായ മിഥുന്‍ലാല്‍ (26), പടിഞ്ഞാറെ പുതിയോട്ടില്‍ എം.പി. നിഖില്‍ നാഥ് (24), കെ.കെ. വൈശാഖ് (28), കെ.കെ. നിഖില്‍ (29) എന്നിവരെയാണ് അറസ്റ്റുചെയ്തത്. മാഹി എസ്.ഐ ഇ.കെ. രാധാകൃഷ്ണന്‍, എ.എസ്.ഐ സതീശന്‍, ക്രൈം സ്ക്വാഡ് അംഗം സി.വി. ശ്രീജേഷ്, കോണ്‍സ്റ്റബിള്‍ സന്തോഷ് കുമാര്‍, വൈശാഖ് എന്നിവരടങ്ങിയ സംഘമാണ് അറസ്റ്റ് ചെയ്തത്. പ്രതികളെ മാഹി കോടതി റിമാന്‍ഡ് ചെയ്തു. ഇവര്‍ യാത്രചെയ്ത കാറും പൊലീസ് കസ്റ്റഡിയിലെടുത്തു.
