കണ്ണൂര്‍ പാനൂരില്‍ പ്രണയപ്പകയ്ക്ക് ഇരയായി ക്രൂരമായി കൊല ചെയ്യപ്പെട്ട വിഷ്ണുപ്രിയയെ അധിക്ഷേപിച്ച് കുസാറ്റ് സര്‍വ്വകലാശാലാ അദ്ധ്യാപകന്‍. കൊച്ചിന്‍ ശാസ്ത്ര സാങ്കേതിക സര്‍വ്വകലാശാലയിലെ പോളിമര്‍ സയന്‍സ് – റബ്ബര്‍ ടെക്‌നോളജി വിഭാഗം മേധാവി ഡോ. പ്രശാന്ത് രാഘവനാണ് പരോക്ഷമായി വിഷ്ണുപ്രിയയെ കുറ്റപ്പെടുത്തി ഫേസ്ബുക്കിലൂടെ പ്രതികരിച്ചത്.
സമൂഹമാധ്യമങ്ങളില്‍ ശ്യാംജിത്തിന്റെ ക്രൂരകൃത്യം ചര്‍ച്ചയായിരിക്കെ ‘അവള്‍ തേച്ചു, അവന്‍ ഒട്ടിച്ചു’ എന്ന് പ്രശാന്ത് രാഘവന്‍ ഫേസ്ബുക്കില്‍ കുറിച്ചു.
വിദ്യാര്‍ത്ഥികള്‍ ഉള്‍പ്പെടെ വിമര്‍ശനവുമായി എത്തിയെങ്കിലും പ്രശാന്ത് രാഘവന്‍ പോസ്റ്റ് പിന്‍വലിക്കാന്‍ തയ്യാറായില്ല. ചോദ്യം ചെയ്ത് കമന്റ് ബോക്‌സിലെത്തിയവര്‍ക്ക് മുന്നില്‍ അദ്ധ്യാപകന്‍ തന്റേതായ വാദഗതികള്‍ നിരത്തുന്നുമുണ്ട്. പെണ്‍കുട്ടി സുഹൃത്തില്‍ നിന്ന് അകന്ന് കൊലയ്ക്ക് കാരണമുണ്ടാക്കിയെന്ന തരത്തിലാണ് പ്രശാന്ത് രാഘവന്റെ വാദങ്ങള്‍.
കൊല്ലപ്പെട്ട പെണ്‍കുട്ടിയെ കുറ്റപ്പെടുത്തിക്കൊണ്ടുള്ള അദ്ധ്യാപകന്റെ പ്രതികരണത്തിനെതിരെ പ്രതിഷേധവുമായി കുസാറ്റ് എസ്എഫ്ഐ രംഗത്തെത്തി. ഡോ. പ്രശാന്ത് രാഘവന്‍ തന്റെ ഫേസ്ബുക്ക് പോസ്റ്റ് പിന്‍വലിച്ച് പൊതുസമൂഹത്തോട് മാപ്പ് പറയാന്‍ തയ്യാറാകണമെന്നും യൂണിവേഴ്‌സിറ്റി സമൂഹം ഈ വിഷയത്തില്‍ ഗൗരവപൂര്‍വ്വം പ്രതിഷേധിക്കേണമെന്നും എസ്എഫ്ഐ ആവശ്യപ്പെട്ടു.
‘പ്രണയത്തിലെ ജനാധിപത്യത്തെ റദ്ദ് ചെയ്തുകൊണ്ട് കൊലപാതക ഭീകരത കാട്ടുന്ന യുവസമൂഹം പടര്‍ത്തുന്ന ഭീതി വളരെ വലുതാണ്.സമൂഹമാകമാനം ഈ വിഷയത്തിന്റെ ഗൗരവം ഉള്‍ക്കൊണ്ട് കൃത്യമായ നിലപാടെടുക്കേണ്ടത് വലിയ ഉത്തരവാദിത്വമാണ്.
എന്നാല്‍ ഇത്രയേറെ പ്രശസ്തിയില്‍ നില്ക്കുന്ന, വലിയൊരു വിദ്യാര്‍ത്ഥിസമൂഹത്തെ ഉള്‍ക്കൊള്ളുന്ന, നമ്മുടെ യൂണിവേഴ്‌സിറ്റിയ്ക്കകത്തെ ഒരു ഡിപ്പാര്‍ട്ട്‌മെന്റിന്റെ ഉത്തരവാദിത്വപ്പെട്ട സ്ഥാനം കൈകാര്യം ചെയ്യുന്ന അധികാരി എന്ന നിലയില്‍ വിദ്യാര്‍ത്ഥികളെ ബോധവല്‍ക്കരിക്കേണ്ട തന്റെ ഉത്തരവാദിത്വത്തെ പൂര്‍ണ്ണമായും മറന്നു കൊണ്ട് ഡോ. പ്രശാന്ത് രാഘവന്‍ പൊതുവായ ഒരു പ്ലാറ്റ്‌ഫോമില്‍ വിഷയത്തിന്റെ പ്രാധാന്യത്തേയും ഭീകരതയേയും നിസാരവല്‍ക്കരിക്കുന്ന തരത്തില്‍ നടത്തിയ പരാമര്‍ശം യൂണിവേഴ്‌സിറ്റിക്കും മുഴുവന്‍ സമൂഹത്തിനും ഒന്നടങ്കം ലജ്ജാവഹമാണ്,’ എസ്എഫ്ഐ കുസാറ്റ് ഫേസ്ബുക്കില്‍ കുറിച്ചു.
