മാഹി: ഇ.പ്ലാനറ്റ് കപ്പിന് വേണ്ടിയുള്ള മാഹി സ്പോർട്സ് ക്ലബ് ലൈബ്രറി ആന്‍റ് കലാസമിതിയുടെ ആഭിമുഖ്യത്തിൽ നടത്തുന്ന മുപ്പത്തൊൻപതാമത് അഖിലേന്ത്യാ ഫ്ലഡ് ലൈറ്റ് സെവൻസ് ഫുട്ബാൾ ടൂർണമെൻറ് ഡിസമ്പർ 20 ന് ആരംഭിക്കും. 2023 ജനുവരി 8 ന് ഫൈനൽ മത്സരം നടക്കും.16 പ്രമുഖ ടീമുകൾ പങ്കെടുക്കും.15 മത്സരമുണ്ടാകും. വനിതാ പ്രദർശന മത്സരവും, കുട്ടികളുടെ മത്സരവും ഉണ്ടാകും.അനുബന്ധമായി ഫുട്ബാളുമായി ബന്ധപ്പെട്ട ചിത്രരചന, റോഡ് ഷോ, ഷൂട്ട്ഔട്ട് തുടങ്ങിയവ സംഘടിപ്പിക്കും.
പ്ലാസ് ദ ആംസ് മൈതാനത്ത് ഫ്ലഡ് ലൈറ്റിലാണ് മത്സരം നടക്കുക. രണ്ടായിരം കാണികൾക്കായി താൽക്കാലിക ഗാലറി ഒരുക്കും. വിദ്യാർത്ഥികൾക്ക് മിതമായ നിരക്കിൽ കളി കാണാൻ പ്രത്യേക ഗാലറിയുമുണ്ടാകും. തലശ്ശേരി പ്രസ്സ് ഫോറത്തിൽ നടന്ന ചടങ്ങിൽ പോസ്റ്റർ റിലീസ് ചെയ്തു. ഗാലറിയുടെ കാൽനാട്ട് കർമ്മം 7 ന് കാലത്ത് 10 മണിക്ക് മുൻ എം.എൽ.എ.ഡോ: വി. രാമചന്ദ്രൻ നിർവഹിക്കും.
വഴിതെറ്റി പോകുന്ന ബാല്യത്തെ മാരക മയക്കുമരുന്നിന്‍റെ പിടിയിൽ നിന്നും വഴിതിരിച്ചുവിടുക എന്നതാണ് ഈ വർഷത്തെ ഫുട്ബാൾ ടൂർണമെൻറ് മുന്നോട്ടുവയ്ക്കുന്ന സന്ദേശമെന്ന് സംഘാടക സമിതി ചെയർമാൻ ജിനോസ് ബഷീർ, രക്ഷാധികാരി കെ.പി. സുനിൽകുമാർ, ക്ലബ് സിക്രട്ടരി എ. ജയരാജ്, പബ്ലിസിറ്റി കൺവീനർ വിനയൻ പുത്തലം എന്നിവർ അറിയിച്ചു.
