യുവാവ് വളപട്ടണം പുഴയിലേക്ക് ചാടിയതായുള്ള സംശയത്തെത്തുടർന്ന് അഗ്നിരക്ഷാസേനയുടെ സ്കൂബ ടീം അടക്കം പുഴയിൽ തിരച്ചിൽ നടത്തി.തിങ്കളാഴ്ച രാവിലെ മുതൽ തുടങ്ങിയ തിരച്ചിൽ വൈകുന്നേരംവരെ തുടർന്നു. എന്നാൽ ഒരു തുമ്പും കിട്ടിയില്ല.
വളപട്ടണം പാലത്തിന് സമീപം ഒരുജോഡി ചെരുപ്പ് കണ്ടതിനെത്തുടർന്നാണ് യുവാവ് പുഴയിലേക്ക് ചാടിയതായുള്ള സംശയം ബലപ്പെട്ടത്. അതിനിടെ വളപട്ടണം സ്വദേശിയായ ഒരു യുവാവിനെ ഞായറാഴ്ച രാവിലെ കാണാതായതായി വളപട്ടണം പോലീസിൽ പരാതിയും ലഭിച്ചിട്ടുണ്ട്.കണ്ണൂർ, തളിപ്പറമ്പ്, പയ്യന്നൂർ, തലശ്ശേരി എന്നിവിടങ്ങളിൽനിന്നുള്ള അഗ്നിരക്ഷാസേനയുടെ സ്കൂബ ടീമാണ് തിരച്ചിലിന് നേതൃത്വം നൽകിയത്.
ജില്ലാ സ്കൂബ ടീം സ്റ്റേഷൻ ഓഫീസർ വാസന്ത് ചെയ്യച്ചാക്കണ്ടി, സ്റ്റേഷൻ ഓഫീസർ ഷാനിത്ത് എന്നിവരാണ് രക്ഷാപ്രവർത്തനങ്ങൾക്ക് നേതൃത്വം നൽകിയത്. തീരദേശ സേനയുടെയും റവന്യൂ വകുപ്പിന്റെയും സഹായവും രക്ഷാപ്രവർത്തനത്തിനുണ്ടായി. തിരച്ചിൽ ചൊവ്വാഴ്ചയും തുടരാനാണ് തീരുമാനം.
